Keyfiyyətli benzinə tələbat gündən-günə artmaqdadır. Benzinin oktan ədədini aromatik karbohidrogenlər hesabına artırmaq ekoloji cəhətdən əlverişli olmadığından benzinin keyfiyyətini artırmaq üçün izokomponentli alkilatlardan istifadə edilməsi daha məqsədəuyğun hesab olunur. Benzinin tərkibində izokomponentlərin miqdarı artdıqca ekoloji cəhətlə yanaşı detonasiyaya qarşı davamlılıq da artmış olur. Parafinli neftlərin benzin fraksiyasının tərkibində adətən normal alkanların miqdarı çox olduğundan detonasiyaya davamlılığı aşağı olur. Detonasiyaya davamlılığı artırmaq üçün normal alkanları izomerləşdirmək lazımdır.

Alkanların C₅-C₆ izomerləşmə prosesinin əhəmiyyəti benzin fraksiyasının riforminqinin sürətli inkişafı ilə əlaqədardır. Alkilləşmə prosesində izobutan ilə butilendən alınan komponentlərin 80%-nin qaynama temperatur intervalı 70-130⁰C olduğundan detonasiyaya davamlılığı artırmaq üçün yeganə yol C₅-C₆ n-alkanların heterogen katalizatorlar üzərində izomerləşməsidir. Bununla yanaşı benzin fraksiyasının piroliz prosesində C₅-C₇ normal karbohidrogenləri alınır. Bunların izomerləşməsi həm iqtisadi, həm də ekoloji cəhətdən əlverişlidir.

Karbohidrogenlərin izomerləşmə reaksiyası əsasən turşu tipli katalizatorlarda (bərk və maye turşular) gedirlər. Əsaslar üzərində izomerləşmə sürəti çox yavaş olduğundan praktiki əhəmiyyətə malik deyildirlər. Sənayedə karbohidrogenlərin izomerləşmə fraksiyası H₂SO₄ və AlCl₃ üzərində tətbiq olunmuşdur. Alkan və olefinlərin skelet izomerləşmə reaksiyası adi izomerləşməyə nisbətən çətin prosesdir. Skelet izomerləşmə üçün katalizatorun turşuluğu yüksək olmalıdır və eyni zamanda yüksək temperatur şəraiti tələb olunur. Normal alkanları izomerləşmə prosesinin aparılma temperaturuna görə üç qrupa bölmək olar. Birinci qrupa aşağı temperaturda 200⁰C-yə qədər, ikinci qrupa orta temperaturda 200-380⁰C-yə qədər, üçüncü qrupa yüksək temperaturda 380⁰C-də aparılan proseslər daxildir. İzomerləşmə prosesinə belə yanaşmaqla onları, məlum katalizatorların aktivliyinə görə üç qrupa bölmək olar. Bu halda hər qrup katalizatorların kimyəvi tərkibi və təbiətini də nəzərə almaq lazımdır. İzomerləşmə reaksiyasında çoxlu miqdarda qaz, maye və bərk katalizatorlardan istifadə edilir. Bu katalizatorlar aktiv birləşmələr olub aşağıdakılardan ibarətdir:

- Əsaslar, hidroksidlər, aminlər, hidridlər;

- Hidrogenli turşular (sulfat, hidrogenflorid, florsulfenlər);

- Yüksək turşulu;

- Alüminium hallogenləri (AlCl₃+HCl; AlBr₃+HBr);

- Bərk oksid və sulfidlər ( Al₂O₃ ; nAl₂O₃ ^. mSiO₃; );

- Xüsusi daşıyıcılar üzərində hopdurulmuş metallar (Pt və ya Pd Al₂O₃ üzərində).

Birinci növ katalizatorlardan hidrogen florid qaz halında buten-1-in, buten-2 -yə və n-butanın izobutana izomerləşmə reaksiyasında istifadə edilir. Maye fazada izomerləşmə katalizatorları kimi sulfat turşusu və onun törəmələrindən istifadə edilir. Bunların ümumi formulu XSO₃H:

- Xlorsulfitli ClSO₃H;

- Flor sulfitli FSO₃H;

- Etansulfoturşu C₂H₅SO₃H;

- Benzolsulfoturşu - C₆H₅SO₃H;

- Toluolsulfoturşu CH₃C₆H₄SO₃H və s.

Bununla yanaşı orta fosfat turşusu H₃PO₄, xlor turşusu HClO₄, hidrogen florid HF istifadə olunur. Bu göstərilən katalizatorlar 0 ⁰C-dən 150⁰C temperatur intervalına qədər izomerləşmə reaksiyasında aktivliyə malik olurlar. Maye fazada izomerləşmə reaksiyası temperaturun artması ilə artır və çox yüksək temperaturda izomerləşmə reaksiyası kəskin azalır, bu da kənar reaksiyaların getməsindən irəli gəlir. Maye hidrogenli turşularla doymuş və olefin karbohidrogenlərin izomerləşməsi aparılmışdır. 

1) İzoparafində metan quruluşun miqrasiyası və s. Məsələn, 3-metilheksan hidrogenli turşu katalizatoru iştirakı ilə 70- 110⁰C-da 2-metilheksana çevrilir.

2) Normal parafinlər skelet izomerləşməyə uğradılır. Bu proses maye katalizator XSO₃H üzərində aparılır.

3) Olefinlərin sis-trans izomerləşməsi hidrogenli turşular (HCl, HBr, H₂SO₄) üzərində aşağı və yüksək temperaturda aparılır.

4) Olefinlərdə ikiqat rabitənin miqrasiyası. Bu proses üçün sis-trans izomerləşmə prosesinin katalizatorlarından istifadə olunur.